نبش فالماضي قصص بالدارجة

 نبش_الماضي

لبارح مع لفجر ضربتني لفيقة وبقيت كانسركل فالميساجات لقدام حتى وصلت الميساجات ديال 2017 كانتصادف مع هاد سكرين ديال هاد البنت لي ماشي أي بنت عادية ... حيث بيني وبينها ماضي كبير كنت مصاحب معاها من نهار كان فعمرها 14 سنة وانا فديك لوقيتا كنت مزال كانقرا فالكاطريماني دوزنا قصة ماشي ساهل باش تيقها كنا نبغيو بعضياتنا لدرجة ماتصورش من 2010 وحنا مع بعضياتنا وكبرنا مع بعضياتنا كنا كانعيشو نهارنا بزوج ع طولو يوميا ماعمرني عرفت شي بنت من غيرها ، صراحة حليت عينيا عليها وهيا كذلك تخيلو معايا حتى صحاب دارهم عياو مايديرو أي طريقة باش يفرقونا والو حتى حاجة مكانت تقدر دخل بيناتنا لدرجة واحد المرة وصلت حتى لسبيطار بالضرب ديال خوها ملي لقاها معايا وحتى أنا شحال كليت و وكلت ديال لعصى ع قبلها تقريبا نص لمدينة كانت عارفانا مصاحبين حيث ماخلينا حتى بلاصة ماكناش كانتفارقو ديما بزوج وعشنا كاع المراحل مع بعضياتنا ملي كانت تقرا ف سابعة إعدادي حتى وصلت لباك وحنا مزال بزوج ولكن واحد النقطة كانت بيناتنا ونا ماكنتش نآمن بيها هي أنا كنت مقودة عليا بمعنى الكلمة وهي العكس كانت عايشا فدارهم حياة البورجوازية ولكن عمرني حسيت معاها بالفرق كانت كاتشوفني كلش وعمرها خلاتني نحس بالنقص معاها
بين ليلة ونهار تقلب كلش باش الحل الوحيد لي بقا لصحاب دارهم يفرقونا هو يزوجوها لأول واحد جا خطبها "أستاد" ولباس عليه ميسر ضغطو عليها بزاف ومنعوها من لخريج وخرجوها حتى من لقرايا كانت غاطلع لفاك ومنعوها تزيد مابقيتش نشوفها بالسيمانة حتى دازت شي شهرين حسيت بيها تبدلت بزاف وبقات كاتبكي كلما نشوفها أنا ماقدرتش نصبر حتى تلاقيت معاها بزز وبالتخبية قالتلي خاصنا نتفارقو أنا غانتزوج وراتني الخاتم ف صبعها كانت أقود صدمة فحياتي كان فعمري 20 عام معرفت اش ندير تخربقت مهم مابقاتش كاتجي عندي كلما نطلب منها نتلقاو فالتلفون ولا نصيفط لها مع شي بنت فلخر بديت نقطع لياس حيث حسيت بيها بعدت بزاف حسيت بصدمة ماشي عادية كلش وليت نشوفو ظلام دخلت فحالة اكتئاب حاد ومابقيتش كانصحى بقيت كانتعاطى أي حاجة تقدر تنسيني " حشيش " شراب حتى نفقد الوعي مرا نطيح فدار مرا برا تخليت ع كلش قرايتي صحابي حياتي كلها حتى وصلت لدرجة والديا ماقدروش يتحملوني حسيت براسي ضعت وكل طريق ندوز منها نتفكر ملي كنا كانتمشاو وشادين اليد فاليد وكانضحكو ولا مدابزين ولا ملي كنا نتصالحو صوتها بقا لاصق فودني بقات كاتجيني كل ليلة فالمنام تبكي كانفيق نغوت عمرني نسا داك العام ماقدرتش نصبر واحد ليلة هزيت صاكي والله اخوتي مزالني عاقل كانت 40 dh فجيبي مهم ركبت فالكار ومعارفش فين غادي بغيت غ نهرب من لخيال ديالها كنت كنشوفو ديما حدايا معرفتش واش زادت لحشيش أثرت فيا ولا كنت قريب نهبل بديك صدمة كنت خايف من خيالها بزاف رعب اخوتي عشتو مهم شديت طريق حتى لمحطة لخرة ونزلت بقيت غ كانتمشى سلاتلي لفلوس بقيت كاندوز نهار بالجوع عادي ومحاس بوالو والله العظيم الى دموع كانو ينزلولي بكثرت لوجع ديال الجوع حتى نسخف بحال نتمشى بالحفى بحال نتمشى بالصبادرين لحمي ماكنتش كانحس بيه فكل بلاصة كانرمي عيني كانشوفها غ هيا حتى بقيت كانحس بعقلي مابقاش فبلاصتو عينيا كحالو من لتحت وجهي شحاف جبت شهر ونا متشرد كانبات فين ما طاح عليا ظلام مرة كانفيق لقا شماكرية يدابز عند راسي مرة كانشوف ناس يضحكو ع حالتي بحالا كان فعمري 70 سنة حتى لواحد لمرة كنت ناعس فواحد الجردة ونفيق نلقى واحد العساس حدايا سولني اش كادير هنا قلتلو كانقلب ع خدمة قالي من زهرك عاد دبا كان معايا شاف ديال هاد شانطي كان يقلب ع خدام درت معاه صباح نولي مع 6 هيا هاديك بديت كانخدم فنيطواياج فواحد شركة كاتبني دوك لبارطمات ديال سكن الاقتصادي كنت كانخدم غ باش ناكل مهم فليل كلش الخدامة كايمشيو لديورهم ونا كانعس غ على جنب داك شانطي وجا عندي داك لعساس سولني فين كانسكن واش جابني هنا حكيتلو حكايتي صراحة دموع طاحولو بقيت فيه وعمرني نسا خيرو هدر مع شاف يشوفلي شي برطمة تما نبقى نبات فيها وجابلي لفراش من دارو وبقيت معاهم لمدة 6 شهور وتنقلو لمدينة اخرى ومشيت معاهم وبقيت هكا مدة عام حتى حد معارفني فين كاين الواليدة الله يسمحلي منها بكات عليا دم معارفاني حي ولا ميت كانت كل ليلة كاتبات تسناني حدا لباب وتبكي وأنا أصلا ماكنتش عادي فنفسيتي كنت محطم بمعنى الكلمة وماكنت نقدر حتى نهدر حتى بديت نحس براسي بقيت نولي مزيان شويا وقررت نرجع لمدينتي رجعت عنقوني والديا وبكاو بزاف بقيت كانحاول نتأقلم فمدينتي ونضبر خدمة قررت نبقى نفرش سلعة فجوطية ونبيع ونشري وسبحان الله رجع عندي اقبال كبير وليت نكسب كليان ونكبر المشروع ودخلت لضومين ديال تجارة بقيت كانهبط لكازا نتقضى الجملة وضبرت فمحال فواحد سويقة ديال لبرارك ودرت تجارة ع قد الحال ولكن وخا هكاك ديما بقيت نحس براسي ميت لداخل ومنعازل مكانهدر لا مع صحاب ولا بنات وهكدا كملت حياتي .... شي كايقول فقدتها شي كايقول تعقد مهم بزاف لهدرة كنت كانسمع موجهة ليا ولكن ديما ساكت ومكانجاوب حد ..حتى ل 2017 نتصادف معاها فالفايس صيفطتلي هيا ولقيتها مزال مخطوبة كدبت عليا قالتلي فسخت الخطوبة ومباقيتش باغيا ندير شي علاقة ع أساس تاهيا دخلت فحالة اكتئاب كانت ديك ليلة فشكل فاش شاطيت معاها حسيت روح رجعت فيا وقلت غاتحن فيا حيث ديما هيا لي كانت تفهمني وتحس بيا وماشي مشكيل داكشي لي دوزت ع قبلها حيث فلخر ربي را جمعني بيها وقلتلها مستعد من غدا نجي نخطبك ونرجعو دوك ليام ونتزوج بيك ونا كانكتب الميساجات بلهفة ويديا مرعودين ولكن الحقيقة من هادشي كامل فهاد سكرين كيفاش جاوبتني برودة بحالا ماعمرها عرفتني أنا كنموت حداها وهي كاتستمتع ،هيا كانت مخطوبة من نفس شخص وكانت قريب دير العرس ومابغاتش نتزوج بيها ع قبل الوضع المادي ديالي وكانت ديجا مصاحبا مع داك سيد حتى ملي كنت معاها بلا خباري ولكن لحد الآن هيا معارفاش شنو داز عليا بسبابها ونفس الوقت عرفت كلش دوك الاحداث بي وقعو خلف الكواليس ونا ماكنتش عارفهم بلي كانت خايناني من لول وكانت كاتمثل عليا بوجه برئ ....ولكن وخا هكاك لحد الآن ماحقدتش عليها حيث عارف من المنطق تقدر تفكر ف مستقبالها والدها يكبرو فجو زوين ومايكبروش بحالي ولكن نفس الوقت حسيت بالحكرة معرفتش علاش ولكن حسيت براسي محكور ولكن من الحكمة ربي عارف علاش خلقني فقير ونعيش هاد ظروف أصلا ولفت شحال من حاجة كنت نتمنى نشريها ماقدرتش نوصلها وحتى هيا نعتابرها من دوك لحوايج لي كنت نتمنى نشريهم ولكن مكانش عندي الجهد باش مانعيش محروم من كل مابغيت ف حياتي
ولكن بلا خاطري من رجعت قاصي بزاف لدرجة نشوف بنت تموت حدايا ماتحرك فيا حتى شعرة لي سماوني قاسي القلب  ولكن حتى حد معارف علاش