الداخلة طراجيات لجنوب

  طراجي_الجنوب

السلام عليكم.
بزاف تريبرز كايفكرو يديرو الجنوب في الصيف
اليوم غادي نهضر على الطراجي ديال الصحرا مفصل و فيه جميع البليصات لي غادي تمرو عليهم و تشوفوهم.
البداية من أكادير. ركزو معايا.
أكادير تيزنيت الكزيرة مير اللفت غاتصيدو فيها الحوت موجود. إيفني كلميم فالطريق بين كلميم و طانطان غاترتاحو فواحد البلاصة سميتها رأس إمليل فيها قهيوات خاصين بالشيافر ديال الرموكات كايرتاحو فيها يعني الى كنتو قراب ليها تجيو ليه و يمكن من تم تشدو اوتوستوب الى تحنسرتو..توصلو لطانطان تجيبو دويرة و تشدوها للوطية بعيدة بشي 20 كلم ضربو فيها ليلة باش ترتاحو و من تم تشدوها لواد الشبيكة ولا جماعة الشبيكة. بين طانطان والعيون كاين 300 كلم و بيناتهم كاين فيلاج صغير سميتو أخفنير (طنطان 130 كلم > أخفنير > 170 العيون)
بين طانطان و أخفنير كاين الوديان فيهم قناطر دايزة فوقهم الطريق الوطنية رقم 1 (واد العكيك. وادالرمل. واد ام فاطمة. واد الشبيكة. الواد الواعر). و أخفنير غاتلقاو فبها لي بغيتو فالتقضية و تشوفو كيران الجنوب واقفين و الرموكات و من تم ممكن تشدو اوتوستوب و نيادت تطلو على على البحر من العلاوات مناظر زوينة. و بين أخفنير العيون كاين 3 مقاطع الرمل مهمة يعني الرملة كادوز وسط الطريق يوميا(مقطع أودري. مقطع صبخة تازغة. مقطع اخنيفيس) فطريقكم للعيون ضروري تمشيو لطرفاية كاين قبل لعيون ب 100 كلم. و تمشيو لبحيروطة النعيلة تستمتعو بالتنوع الإيكولوجي و جمال البخيرة و الطيور المهاجرة و الكالم و امتزاج الصحراء و البحر. من تم للعيون ترتاحو فيها و تمشيو لشاطيء فم الواد ممكن تباتو فيه. و من تم تزورو مدينة المرسى فين كاين ميناء العيون و كايسميها لبلاية و هي منكقة صناعية فيها الوزينات ديال الحوت و بعيدة على العيون بشي 30 كلم. من بعد تشدو الطريق لبوجدور. بين بوجدور و العيون كاين 200 كلم فيها مركز لمسيد فيه قهوة و حنوت و جامع كبير و سطاسيون. توصلو بوجدور تمشيو لشاطيء أوزوالت و شواطيء كثيرة راءعة و قرى صيد موجودة..من تم للداخلة ان شاء الله كاين 345 كلم و هي أطول مسافة بين 2 مدن فالمغرب. بيناتهم كاين قهيوات على الطريق و 2 مشهورين فمنطقة واد الكراع على بعد 165 كلم من بوجدور. من بعد تشدوها للداخلة و منين تقربو كاين بزاف دلمناطق و شواطيء و قرى الصيد. كاين شاطيء 28 و شاطيء 25 و شاطيء أم لبوير و ساريج سخون فيه ما كبريتي. و كاين قرية الصيد لاسركا و شبه حزيرة الداخلة كلها شواطيء و كاين جزيرة التنين على بعد 25 كلم من الداخلة. ممكن تمشبو لهضبة رملية سميتها la dune blanche رملة داخلة مع البحر منظر واعر. و تمشيو للعركوب بعيد على المدينة ب 80 كلم. ووتمشيو لصبخة إمليلي بعيدة يمكن بشي 120 كلم على المدينة. فيها ضايات مالحة وسط الصحراء و فيهم الحوت منظر جميل جدا.
*ملاحظات مهمة:
- جيب معاك أوراقلي كتقبت الهوية ديالك (بطاقة التعريف أو جواز سفر لي كان ). على حساب شي براج ولا مراقبة فالطريق.
- الجنوب فيه غير الوطى مكاين لا جبال لا غابات لا والو و الجو معتدل ماشي سخون بزااف كيما كايقولو.
- نوصيك على شال و جاكيطة دافية شوية على حسب الليل و سبرديلة خفيفة يعني بلا ماتثقل يالصباط.
- الشال مهم على الرملة و الغبرة و لكن ماتلتموش بيه فالمدن و ملي تبغيو تشدو اوتوسطوب.
- فينما راح عليك الليل طونطي و من الافضل بعد شوية على المدينة و الى كنتي فالساحل ديما بعد على شوية على الشط حيناذ البحر كايطلع شوية.
- الأمن و الأمان و الناس مضيافين و اجتماعيين لي حتاجيتوها غاظي تلقاوها غير سول.
- الحطب قليل جيب معاك كامبينغ غاز ضروري للضرورة و العمارة راه موجودة فالجنوب.
- الخوف مسألة طبيعية و لكن ثيقو بيا راه أسهل طراجي ممكن دير فحياتك هو هذا.